De lütten, lütten Steern
De lütten, lütten Steern,
Wa seeg ick se so geern!
Se mahnt mi an so mennig Nacht,
Wo ick mit di tohopen sacht
Dar buten snackt vun all de Pracht,
Hoch baben in de Feern.
De lütten, lütten Steern,
Wa seeg ick se so geern!
Wi seeten wul vör Glück to ween’n,
Un meen’n: dat Leben weer so schön,
Doch müss’t dar wul noch schöner we’n,
Hoch baben in de Feern.
De lütten, lütten Steern,
Wa seeg ick se so geern!
Se brennt noch, als se damals brenn‘, –
De schöne Tid is blots to Enn, –
Un du, – du büst dar lang all hen.
Hoch baben in de Feern.
De lütten, lütten Steern,
Wa seeg ick se so geern!
Un wünsch un be‘, dat’t bald verbi.
Denn lücht se na de Heimat mi,
Wul hin na di, ja hin na di.
Hoch baben in de Feern!
Johann Meyer
Spruechetante.de: Sprüche, Gedichte, Zitate läuft unter